"Poesie" in talamonese
di Cesare Ciaponi    

La casalingo     (1996)

La casalingo l'è la règino dè la cà
la levo a bunuro e la gaa sèmpri dà fà
la cumincio la giurnädo cul preparà la culaziuñ
per tücc' i soo durmentuñ

EI ghè po' tücc' i mèsteer dà fà
nètà- gicà- lavà-stirà
la va po' a fa la speso
chè a fa quadrà i cünt l'è sèmpri 'n impreso

Lee al sò umètt
la ghè prèparo pitänsiñ è manicarèt
lüü èl sè sèto, èl mangio po' l' taas
èl mäi pusibèl ch' èl ghè faghi mingo caas?

Sè l'um èl rivo a cà al venèrdì
lüü e-glià vööl sèmpri lì
lee la gaa po' daa dotru dà fà
èl scirchi dà mingo falo trèbülà

Sè la gaa un fiööl pèniñ
l'è sèmpri in mèzz a patei è buzzètiñ
l'um èl sè sent ün puu trascuraa
lee "per piasè, tòm mingo ul fiaa"

Ogni tänt la và a na' quai cunfèrenso
l'istruziuñ la ghè vööl, sè po' mingo stà senso
adèss pèrò ghè daa l' assuciaziuñ
per risolf i prublemi e daa èl quèstiñi

I fiööi i è-gliaa levaa sù un puu viziaa
ei fà sù ul gniff al furmacc' è daa c'al salaa
l'èro quasi mèi un bòtt
quänt chè è-glià levavo sù dumò a pancott

Ogni tänt l'aa dà bèsugn dà sfugass
crumpà vèrgutt dè oor u n' dà a spass
a stà seraa dè dent in quatru cäntuñ
quai vöölt èl dà scià ün puu ul maguñ

Süi prublemi dè la nocc'
l'è mèi ch'èl ghè siès mingo tänci occ'
in cèrti sitüaziuñ
l'è d' obbligu la discrèziuñ

L'è mäi finido in dè nà cà
sè pö' mäi vèss strach è gnää pusà
la n' arèss vöio da ciapà la pensiuñ
mä la rivarà po' dumò cun l'ültimo benèdiziuñ