"Poesie" in talamonese
di Cesare Ciaponi    

La sciuro mäèstro     (1997)

Vööi parlaf dè n'ä' mäèstro dul paiis
chè l' èro 'n tipu ün puu prèciis
la supurtavo mingo i scaribocc'
quèlo l'èro robo per mätucocc'

Fino da la primo elementaar
la cuminciavo a parlà ciar
vardii mätèi chè 'n sèmo mì
ghè sarà po' mingo tänt da rì

La insègnavo storio e geugrafio
aritmetico e geumetrio
ogni tant la favo daa disègn
"l'è da tegnii suto sè ès vööl lagà 'l sègn"

I mätèi èi sè sètavo ün puu strèmii
èi favo sèmpri parè da vè capii
se la lèziuñ l'èro da ripèt
èi vèdi vo mingo l' uro da dèsmètt

An dopu an èi capivo la rèsuñ
l'èro da stà atento a la lèziuñ
i cumpiti sè pudivo mingo lagà stà da fai
èi vavo mingo i genitur a giüstificai

Inscì èi favo ün puu dè agn fà
quänt chè i bardasi èi favo menu trèbulà
sè po' èi vulivo mingo capì la rèsuñ
èl vulavo daa 'n quai crapaduñ

Adèss i matèi è-glià vizio da pèniñ
è-glià levo sù a lacc' in pulvèr è biscutiñ
"vuoi questo amore?" tu sentèt a dì
l'è da stà atento, èi nè aprufito a fa 'n scì

In dèl class i maestri ei insègno in trii
per tirai sù pusèe istrtüii
divèrsi mäteri növi iaa da stüdià
insiemistico, lingui èstèri è piturà

A fai stà fèrmi l'è ün impreso
cumè sè faal a prètent la reso
dent per la crapo èi gaa dumò cartuñ
cun quèlo bèstio dè televisiuñ

Lur èi saa pciù cusè fa
per stimulai a stüdià
spèss è untero iè svugliaa
al lèziuñ iè mingo tant intèrèsaa

Ogni tant ghè l'incuntru cui genitur
chè i fiööi è-glià vèt giamò dutur
cumè sè faal a dich chè iè cargaa 'n dree
la culpo l'è di maestri chè insègno mingo bee

Per stì mätèi un puu lazzaruñ
èl và truvaa n'a' suluziuñ
a 'n sègnä' 'n dè la scòlo l'è n'ä' fadigo
i genitur èi daghi nä' mää a mètèi in rigo