"Poesie" in talamonese
di Cesare Ciaponi    

La sösero     (1996)

La sösero l'è quèlo caro fèmnèto
chè quai völto l' arès da vès püsèe discrèto
cun la suo mänio da cunsiglià
a la lungo la finis po' daa cul stüfà

In dul prim incuntru cul gènèr u la nöro
la fà subèt ul confrunt cul fiöl u la fiölo
è-glià squadro da sù 'n sum a giù 'n funt
per vedè sè vèrgutt èl giro mingo rèdunt

Cusè ghèl po' vègnüü 'n ment al sò tuus dà märidas
in sèmo a lee èl pudivo mingo gnää lamentàs
la rivo l' otro, cul bèli mäneri
ma quai völto la ghè paar senso criteri

La cüsino in dè 'n ä' mänero chè gaa gnää bagiolò
sè fà mingo 'n scì a tratà cun la robo
ul sò fiöl laa da bèsugn da digerì
mingo da vèch ün piis sül stumèc e po' rutì

Parlim po' mingo dul vèstìss
braghi mäglièti e strasciocc' chè lüsiss
aralo mäi pruvaa a pasà dävanti al vedrin
e po' vardà cumè iè vestii sü' i figüriñ

La gaa mingo ul sens dè l' ecunumio
èl palänc cumè glià ciapo li ghè volo vio
cumè faral quel por tämbèrlu a supurtà
quèlo mänero balurdo igliò da fà

Sè a la nöro èl ghè rivo po' ün piniñ
i cunsigli dè sicüür èi aümento ün pitiñ
èl ghè par gnää viro da pudè amò sfugià
tüto la storio dul sò trèbulà

Ul sosèr chè l'è püsèe discrèt
èl ghè racumändo " tè parèl mingo uro dà dèsmètt "
mä' lee la rèspunt dal volt dè la suo esperienso
" di mee cunsigli èi pö' mingo stà senso"

Cul gènèr dè solèt la và püsèè d'acordi
lüü èl stà atento dà mingo fass mètt al cordi
l'è sempri mèi tègnì la distänso dè sicürèzzo
pütost cà fènì cun sü' la cavèzzo

I temp èl paar ch' èi siès dree a cämbià
ma la sösero la cuntinuo sèmpri a sgunfià
èl ghè sempri però nä' quai ecèziuñ
dè bravi söseri chè tè dà sudisfaziuñ