"Poesie" in talamonese
di Cesare Ciaponi    

Da l'estetisto     (2002)

Fa giù nä puesio per sti cucinèli,
chè gliè giuvèni po' daa bèli;
l'è po' mingo gnä ä na fadigo,
basto ciapà la pèno è mètès in cadrigo.

Giamò a sentì la püblicità,
tu pensèt chè na völto t'ee propi da n'dà;
sè i risültaa iè po' quii chè li prumètt,
tu ghè rivèt p-ciü' gnää ca desmètt.

Daa dumò ul pènseer dè l'estetisto,
l'tè fa sta mèi è tu sè mètèt in listo;
gIiè ben bee fèmèn i client,
mä daa quai umègn dent per dent.

Ün acuglienso a l'insègno dè la curtesio,
daa sè l'è tardi li tè mändo mai vio;
dàgl'ungi di pee fino ai cavèi,
tücc' èi vee dè fò n'pitt püsèè bèi.

Ghè chi va pèr nä docio sulaar,
daa sè mi guu mäi vèdüü tänt ciaar;
l'mè paar cumè natüral ciapà ul suul,
quänt sè vööl cambià ün pitt culuur.

Cul tratament "viso-corpo-pedicür",
la fèmno la vee fo rinuvado, quèll'è sicüür;
la ghè paar mäi caro gnää la parcèlo,
quant la sè vardo n'dul specc è la sè vèt püsèè bèlo.

Sè po' la fa ul mäsacc è la depilaziuñ,
ghè spariss d'incäntu strachèzo è maguñ;
glia fa pèr sè stèso po' daa per "lüü",
l'arà po' bee da n'corgès s'è l'è mingo bèüü.

In puchi parol, dè l'estetisto l'è propi da n'dà,
tu pö' sentit mèi per strado cumè a tuo cà;
èl po' vèss l'ucasiuñ pèr cüntalo ün mument,
rilasas è n'dà a cà cuntent.