"Poesie" in talamonese
di Cesare Ciaponi    

Na' matinado cumè n'otro     (1998)

L'è nä' mätinädo cumè n'otro, quèsto chilò
èl suno la svèglio, l'è da saltà fò
a la mämo, dè normo, èl ghè tuco per prim
lee dè sòlèt, la fa menu casiñ

N'ugiado n'dul specc', dopu i bèsugn,
po' vio dè curso a ciamä i otri fun-fugn
preparà ul cafè-lacc' è la märmèlado
ün puu dè büteer, sù nä fèto biscutado

Sè l'um quai völto, l'è giamò levaa
sè capis dul taul, tütt imbrataa
l'aa lagaa n'dà fo l'lacc' dul padèliñ
tänt dèp-ciü' sè l'aa mingo svègliaa i visiñ

Al sègunt invit, èi levo i bardasi n' durment
èi paar scià dè Caporetto, tütt otru ca cuntent
a svègliai a la dumää l'è sèmpri nä' storio
dumò a la siro, chè iè tücc' in glorio

Ei slambroto sü' quèl puu dè culaziuñ
po' vio dè curso a mètt sü' püscì n'magliuñ
rispètà el prècedensi per n'dà n'dul bagn
ch'èi va mingo èl paar sèmpri di agn

Finalment èi sè tò fò, èi va per i söö mèsteer
chii a laurà, chii a scolo, cui söö pènseer
sè capis pèrò chè n' dul bagn èi ghè staa
pigiami è sciavati, ün puu sparpaiaa

El tuco amò a lee, quèlo fèmno bènèdèto
tegnich adoss i strasc', è tirà la carèto
adèss, davänti al specc' la sè fèrmo n'mument
la fa n'pitt dè restauro, la sè distent

La sè gico scià pulitu, per n'dà fo dè cà
la mäschèro n'puu daa l' trèbülà
a n' dà a fa la speso è quai cumisiuñ
la sè presento in urdèn, cumè al funsiuñ

Tegnimuli dè cünt, stì mami pìadi
daa sè n'puu a l'äntico gliè rèstadi
sè n'dì li sè mèt in ment da fa a la rumäno
pensi ch'èl sarès propi nä' bèlo grano